Rusiye arbiyleri ilk küz ayınıñ 5-ne keçken gecesi Rusiye Federatsiyasınıñ beş yönelişinden ve işğal etilgen Qırımnıñ Sarabuz yönelişinden Ukrayinağa "Şahed" tipindeki 157 ücüm pilotsız uçağı ve farqlı çeşit pilotsız uçaqlarenen ücüm etti.
Bundan ğayrı, RF ordusı altı S-300 idare etici zenit raketaları ve X-59 idare etici aviatsiya raketaları ile ücüm etti, dep bildirdi Ukrayina Arbiy Silâlı Quvetleriniñ Ava quvetleri.
"İlk malümatqa köre, saat 9-ğa qadar, ava mudafaası memleketniñ şimalinde ve şarqında duşmannıñ 121 "Şahed" tipindeki pilotsız uçağını ve farqlı tiplerdeki dronlarını urıp tüşürdi", — dep aytıla bildirmede.
Ava quvetleriniñ malümatına köre, yedi raketa ve 35 UAV 10 yerge uruldı. Tam olaraq ne yerde urulğanı belli degil.
Rusiye arbiyleri çeşit silâlardan Ukrayina regionlarına muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturasına ücüm etkenini, vatandaş ealisini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.