Rusiye istinaf mahkemesi Rostov-na-Donuda arbiy mahkemesiniñ 12 ile 17 yıl arasında apis cezasına mahküm etkeni "Qırım musulmanları davası"nıñ mabüsleri Rustem Murasov, Cebbar Bekirov, Zavur Abdullayev ve Rustem Tairovnıñ ükmüni tasdıqlağan. Bunı "Qırım birdmeligi" haber ete.
Haber etilgeni kibi, advokatlar kollegiyanıñ diqqatını birinci instantsiya mahkemesinde işlenilgen bozuvlarğa çekken.
"FSB-niñ terrorcılıq ile küreş çerçivesinde bütün bu areketleri aslında fallerniñ, din adamlarınıñ faaliyetini bastırmaq ve adamlarnı diniy ve siyasiy baqışları sebebinden taqip etmek maqsadını taşıy", - dep bildirdi advokat.
2021 senesi avgustnıñ 7-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp, tutulğan qırımtatarlar «terror teşkilâtını quruv ve iştirak etüvden» şübheli sayıla, dep bildirdi.
İşğal etilgen Qırımda Rusiye quvetçileri Ukrayinanı desteklegenlerni kütleviy şekilde taqip ete. Uquq qoruyıcılarnıñ malümatına köre, Qırımdaki 186 uydurma siyasiy davalarınıñ 110 qurbanı qırımtatardır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
