Çeçek ayınıñ 18-ne keçken gecesi Rusiye Ukrayina üzerinde altı raketa (Qırım territoriyasından bir İskander-M ballistik raketa ve Zaporojjâ vilâyetiniñ işğal etilgen qısmından ve ilhaq etilgen Qırımdan beş İskander-K qanatlı raketa) ve 37 uçucısız uçaqnı uçurdı, dep bildirdi Ukrayina Silâlı quvetleriniñ Ava quvetleri.
"Saat 9:30-nıñ malümatına köre 26 ava nişanınıñ urup tüşürilmesi tasdıqlandı: üç İskander-K qanatlı raketi, 23 "Şahed" tipli pilotsız uçaq", — denile beyanatta.
Ukrayina arbiyleri bildirdi ki, Rusiye ücüminiñ neticesinde Sumşçına, Harkivşçına, Dnepropetrovşçına, Mıkolayivşçına, Kıyivşçına zarar kördi.
Rusiye arbiyleri çeşit silâ qullanıp, Ukrayina regionlarına muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
