Ukrayina Arbiy-ava quvetleriniñ malümatına köre, fevralniñ 10-na kecken gecesi duşman Ukrayinağa Balaklavadan ve Çaıda burnu (Qırım) ve Kursk vilâyetinden (Rusiye) 31 dronnen ücüm etti. Berilgen malümatqa köre, ukrayin arbiyleri 23 Shahed-136/131 tipinde ücüm uçaqlarını urıp tüşürdi.
Ukrayina Arbiy-ava quvetleriniñ bildirgenine köre, Rusiye ücüminiñ esas yönelişleri Odesa ve Harkiv vilâyetleri edi.
Rusiyeniñ Harkivdeki dron ücüminde yedi insan elâk oldı, olarnıñ arasında balalar bar. Yerli akimiyetniñ malümatına köre, patlav neticesinde bir qaç büyük yanğın çıqtı - 15 şahsiy ev yandı.
Aynı zamanda Odesa vilâyetinde Rusiye ücüminden sebep dört insan zarar kördi.
Fevralniñ 10-na keçken gecesi Rusiyeniñ dron ücüminiñ neticesinde Harkivde bir qaç büyük yanğın çıqtı - 15 şahsiy ev yandı. Yerli akimiyetniñ malümatına köre, yedi insan elâk oldı. Baş prokuraturanıñ ofisiniñ malümatına köre, şahsiy evlerden birinde bütün qoranta elâk oldı: aqay, apay ve olarnıñ üç balası: 7 aylıq, 4 ve 7 yaşında oğlanlar. Diger evde 66 yaşında aqay ve 65 yaşında qadın elâk oldılar.
Ukrayina prezidenti Volodımır Zelenskıy yanvarniñ 30-nda bildirdi ki, yılnıñ başından berli Rusiye Ukrayinağa 330-dan ziyade çeşit raketa ve tahminen 600 arbiy uçucısız uçaqnı uçurdı.
Moskva, isbat ve şaatlıqlarğa baqmadan, tam cenk başlağanından berli Ukrayinada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
