RF Federal telükesizlik hızmeti Ukrayina mahsus hızmetleri ile işbirlik etken ve yarımadada silâ anbarlarını azırlğan 48 yaşındaki erkekniñ yaqalanması aqqında haber etti. Bunıñ aqqında TASS Rusiye devlet agentligi haber ete.
"Ukrayina mahsus hızmetleri ile işbirlikte şübeli sayılğan Rusiye vatandaşı yaqalandı. 1975 senesi doğma Bağçasaray rayonınıñ sakini Ukrayina Telükesizlik hızmetiniñ temsilcisi ile işbirlik eterek, yarımadadaki içtimaiy-siyasiy, iqtisadiy ve arbiy vaziyet aqqında malümat bere edi", - dep yazıla bildirmede.
FSB-nıñ malümatına köre, qabaatlı Qırım territoriyasında silâ anbarlarını azırlay edi. Erkekke qarşı sekiz yıl apis cezasını köz ögünde tutqan maddeler ile cinayet davası açılğan.
2014 senesinde başlap Qırımda ve Aqyarda eñ az 16 Ukrayina vatandaşı "casuslıq" ve "diversiya" qabaatı ile apis etilgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz
