Sentâbrniñ 6-na keçken gecesi Rusiye Ukrayinağa eki raketa ve Qırımnıñ Çauda burnu, em de Rusiyeniñ Kursk ve Primorsk-Ahtarsk şeerlerinden uçurılğan "Şahed" tipindeki 44 uçuşsız uçaqnen ücüm etti. Bu aqta Ukrayina Ava quvetleriniñ saba malümatında aytıla.
Ukrayina arbiyleriniñ malümatına köre, umumen Rusiye 46 ava ücümini uçurtqan.
Belli olğanı kibi, ava ücümini toqtatmaq içün aviatsiya, zenit raketa orduları, REB bölükleri, Ava Quvetleri ve Ukraina Mudafaa Quvetleriniñ mobil ateş gruppaları celp etildi.
Müessisede deyler ki, sentâbrniñ 6-nda saba saat 8-ge qadar Ukrayina ava mudafaası 27 dronnı urıp tüşürdi. Hususan, 8 dron Ukrayina territoriyasında ğayıp oldı. Olar REB vastalarınıñ tesirinden tüşkenleri mümkün. Daa bir dron Donetsk vilâyetiniñ Rusiye tarafından işğal etilgen qısmına qaytıp keldi.
"Bir qaç ava nişanı (belki de darbe uçaqları) şimal ava boşluğında közetile. Arbiy işler devam ete", — ava quvetleri haber etti.
Rusiye arbiyleri çeşit silâlardan Ukrayina regionlarına muntazam surette ücüm ete. Delillerge ve şaatlıqlarğa baqmadan, Moskva Ukrayinanıñ vatandaşlarına ücüm etkenini inkâr ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
