Ukrayina Mudafaa naziri Oleksiy Reznikov, Ukrayina ordusınıñ qarşı ücümi yaqın aylarda başlanacaq, dep bildirdi. Bunıñ aqqında ERR neşri yaza.
Mudafaa nazirinden Ukrayinanıñ uruşta ğarp tanklarını ne vaqıt köre bilecegini soradılar. O, Ukrayina Silâlı Quvetleriniñ Baş ştabı ğarp tanklarını qarşı ücüm içün qullanmağa azırlanğanını bildirdi.
"Olar qarar bergenleri kibi, angi annıñ eñ uyğun olacağına bağlıdır. Em de ava şaraitine de bağlıdır. Baarde toprağımız pek dımlıdır. Bellesem, aprel-mayıs ayında körermiz", - dedi Reznikov.
O, bu sene Ukrayinanı müsbet deñişmeler beklegenine inanğanını bildirdi.
Martnıñ 24-nde Rusiye Telükesizlik şurasınıñ reis muavini, sabıq Rusiye przeidenti Dmitriy Medvedev, Ukrayina Silâlı Quvetleriniñ Qırımğa ücümi özek silâsını qullanmağa sebep olacaq, dep bildirdi. Ukrayina Mudafaa nazirliginiñ Baş istihbarat idaresinde, işğal etilgen Qırımnı işğalden azat etip, anda "qanuniy ukrayin akimiyetini" qaytarmaq kerek olğanı aqqında bildirdiler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
