Ukrayina Mudafaa naziri Oleksiy Reznikov Ukrayinağa Almaniyadan MARS II çoqlu ateş raketa sistemaları kelip çıqqanını tasdıqladı.
"Ukrayinağa Almaniyadan MARS II çoqlu ateş raketa sistemaları kelip çıqtı. Almaniyağa ve menim zenaatdaşım Mudafaa naziri Kristina Lambrehtke minnetdarım. Topçularımız alman ortaqlarımıznı alğışlaylar", - dep yazdı o.
İyülniñ 26-nda haber vastaları Almaniya Ukrayinağa üç MARS II çoqlu ateş raketa sistemasını ve üç Panzerhaubitze 2000 özyürer top sistmasını bergenini haber etken edi. Bundan ğayrı Almaniya IRIS-T ava mudafaası siyastamasını Ukrayinağa yollamağa azırlana.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
