Ukrainanıñ işğal etilgen topraqlarınıñ reintegratsiya meseleleri nazirligi, Rusiye politsiyasınıñ hadimleri qırımtatarlarğa ketirgen «qanun bozulmaycağına dair tenbi vesiqaları» «tamır halqnıñ aqlarını sert bir şekilde boza», dep tüşüne. Bu aqta baş nazir muavini, Ukrainanıñ işğal etilgen topraqlarınıñ reintegratsiya meseleleri naziri Aleksey Reznikov bildirdi.
«Mayısnıñ soñunda ya da iyünniñ soñunda ola bilecek bir-eki tedbirni sıñırlamaq ıntıluvı bile hucur kele. Şimdi ekstremizm ya da koronavirus ile küreşke esaslanıp, Qurban bayramını da yasaqlarlar. İşğalci akimiyet mayısnıñ 9-nda olacaq paradnıñ kütleviy repetitsiyalarını yapqanda, çağına yetmegen balalarnı bile celp etkende qırımtatarlarğa evelden bildirgen yasaqları hucur ola. Böyle saylav ve erte yasaqlar tamır halqnıñ aqlarını sert bir şekilde boza», – dep bildire Reznikovnıñ aytqanlarını müessiseniñ matbuat hızmeti.
Daa evel berilgen malümatqa köre, işğal etilgen Qırımda Rusiye politsiyasınıñ hadimleri qırımtatarlarğa «qanun bozulmaycağına dair tenbi vesiqalarını» ketirmege devam ete. Tenbi alğanlar arasında regional Meclis azaları da bar, dep bildirdi Qırımtatar Milliy Meclisiniñ reisi Refat Çubarov.
Onıñ malümatına köre, aprelniñ 9-nda Rusiye politsiyasınıñ hadimleri Sudaqta qırımtatarlarnıñ «evlerini dolaşıp çıqtı». Quvetçiler qırımtatarlardan Meclis teşebbüsinen keçirilecek «Dünya – zorbalıq ve işğalge qarşı. Menlik yürüşi» barışıq aktsiyasında iştirak etüv niyetleri aqqında soradı.
Qırımtatar faali Nariman Celâlnıñ bildirgenine köre, aprelniñ 9-nda Qırımnıñ İçki rayonında da Rusiye politsiyasında «qanun bozulmaycağına dair yedi tenbi vesiqası» alındı. Vesiqada Rusiye quvetçileriniñ mayısnıñ 3-nde «Menlik yürüşinde», mayısnıñ 18-nde «Qırımtatar sürgünligi kününde» ve iyünniñ 26-nda «Qırımtatar halqınıñ bayraq kününde» qanunsız areketler qabul etilmeycegine» dair tenbisi mevcut. Hususan qanunsız kütleviy tedbirler, miting, yürüş, bir kişilik narazılıq aktsiyalarında iştirak etmek yasaqtır».
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde kemirilecek edi. Amma COVID-19 koronavirus pandemiyası sebebinden yürüş keçirilüvi başqa vaqıtqa qaldırıldı.
2014 baarinde işğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette tintüvler ötkere.
