Ukraina Mudafaa naziri Oleysiy Reznikov, fevralniñ 3-nde Türkiyeden delegatsiyanıñ Ukrainağa ziyareti çerçivesinde memleketler arasında, hususan da Ukrainada Bayrktar pilotsız uçaqlarınıñ istisalı içün zavodnıñ quruluvını közde tutqan çerçive añlaşması imzalanacağını bildirdi.
Fevralniñ 3-nde brifing vaqtında Reznikov, Türkiye Mudafaa naziri Hulusi Akar ile başta yüz-yüzge, soñra ise delagatsiyalarnıñ terkibinde körüşecegini haber etti.
"Bugün çerçive añlaşmasınıñ imzalanması planlaştırılır, tüneviy ükümet bu añlaşmanıñ metnini tasdıqladı. Bu, yüksek arbiy tehnologiyalar saasında Ukraina-Türkiye işbirligine attir. Ukraina ükümetinden imza atmaq salâhiyeti maña berildi. Añlaşmanı imzalağan soñ onı muvafıq tasdıqlav protsedurasınıñ keçirilmesi içün Yuqarı Radağa berecekmiz. Bu añlaşmanıñ maddelerinden biri de Ukrainada istisal olunacaq pilotsız uçaqlarnı istisal etken Bayraktar zavodnıñ quruluvıdır. Daa pilotlarımıznı türlü kategoriyalardaki pilotsız uçaqlarnı idare etmege ögretecek bir oqutuv merkezi yaratılacaq", - dedi nazir.
O, "Bayraktar"nı istisal etken Türkiye şirketiniñ qararına köre, kelecek nesil "Motor Siç"niñ istisalı olğan Ukraina köçüricilerini qullanılacağını hatırlattı.
"Bu, tehnologik terkibi ceetinden Ukraina-Türkiye "Bayraktar"ı olacaq. Ve elbette Ukraina ve Türkiye Silâlı quvetlerinde qullanacaq", - dep qoştı o.
