Ukrainanıñ baş nazir muavini, vaqtınca işğal etilgen topraqlarnıñ reintegratsiya naziri Oleksiy Reznikov işğal etilgen Qırım ve Aqyarnı ve Donbasnıñ işğal altındaki topraqlarını Ukraina kontroline qaytarmaq niyetinde olğanını bildirdi.
Bu aqta o, Qırım.Aqiqat Radiosınıñ yayınında ayttı.
«Yarımada ve Aqyar şeei, Donetsk ve Lugansk vilâyetleriniñ bazı rayonları işğal etildi. Menim içün bir prioritet ya da farq yoq. Bu topraqlar işğal altında olğanı içün belli bir ağrım bar. Maqsadım – bu insanlarnı ve bu topraqlarnı Ukrainağa ve Ukraina ükümetiniñ kontroline qaytarmaqtır», – dedi Reznikov.
Baş nazir muavini bildirgenine köre, Ukraina akimiyeti Qırımnı işğalden qurtaruv muzakereleri içün halqara meydançıq qurulmasını istey, amma ne vaqıt ve angi formatta olacağıın tahmin etip olamay.
Ukraina Yuqarı Radasınıñ reisi Dmıtro Razumkov Rusiye işğal etken Qırımnı Ukraina kontroline qaytaruv meselesini «zor ve tez olmaycaq bir esnas» dep adlandırdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
