Ukraina Merkeziy Saylav Komiteti, saylav bölüklerinin 40,21% protokollarını saydı. Birinci yerde - şoumen Volodımır Zelenskıy, oña saylavcılarnıñ 30,23%-ı qol tuttı. Ameldeki prezident Petro Poroşenko aman-aman eki kere azca rey aldı - 16,65 %.
Üçünci yerde “Batkivşçina” (“Vatan”) partiyasınıñ lideri Yuliya Tımoşenko, onda saylavcılarnıñ 13,14% reyleri bar. Namzetniñ ştabında, olarnıñ mustaqil sayuvlarına köre, Tımoşenko 16,1 % reylerni aldı dep bildireler.
Dörtünci yerde “Muhalifet bloku” (“Oppozitsiynıy Blok”) reisi Yuriy Boyko, onda 11,48%. Boykonıñ saylağanlar çoqusı Ukraina şarqında - Donetsk ve Luğansk vilâyetlerinde yaşay.
10%-dan az Anatoliy Ğrıtsenko, İgor Smeşko ve Oleğ Lâşko aldı.
MSK ilân etken neticeler ekzitpol neticelerinen deyerli bir kele. Sorav, Zelenskiy 30,6%, Petro Poroşenko 17,8% ve Yuliya Tımosenko 14,2% aldı dep bildirgen edi.
Saylavlarnıñ birinci basamağında adamlarnıñ iştiragi 63,52% oldı. Bu köstergiç, 2014 olğanınqa köre daa yüksek, o zaman saylavcılarnıñ 60,29% saylavğa kelgen edi.
Prezident saylavlarınıñ birinci basamağınıñ neticelerini Merkeziy saylav komissiya, aprelniñ 10-unace ilân etmek kerek. Saylavnıñ birinci basamağında ğalebe qazanmaq içün bir de bir namzet 50%-dan reyni almaq kerek. Öyle birisi olmasa, saylavnıñ ekinci basamağı aprelniñ 21-inde keçirilecek. Saylavlarnıñ soñ neticeleri mayıs 1-inece çıqarılacaq. Ukrainada prezidentni beş yılğa saylaylar.
