Qırımnıñ şimalindeki Ermeni Bazar ve Krasnoperekopsk şeerlerinde «Z» işaretli Rusiye arbiy tehnikası qayd etildi. Onı Rusiye esas Ukrainağa ketire. Tehnikanıñ areketlerinen foto ve videolar Reuters agentligi tarafından derc etile.
Reuters malümatına köre, «Z» arifli birinci Rusiye arbiy kolonnası esas Ukrainağa doğru kete edi.
Aynı işareti olğan ekinci arbiy tehnika kolonnası Qırım ve esas Ukrainanıñ memuriy sıñırından tahminen 40 km mesafede Krasnoperekopsk civarında toqtalğan edi.
Ukraina Devlet sıñır hızmeti Qırımdan esas Ukrainağa ketken Rusiye arbiy tehnikasınıñ videolarını derc etti.
Bir Ukraina sıñırcısı işğal etilgen Qırımdan açılğan ateş neticesinde elâk oldı.
Ukraina Devlet sıñır hızmeti, Ukraina devlet sıñırı Rusiye, Beyazrusiye ve işğal etilgen Qırım tarafından Rusiye ordularınıñ ücümine oğradı, dep bildirdi.
Fevralniñ 24-nde saba 5-te Rusiye prezidenti Vladimir Putin «DNR» ve «LNR» gruppirovkalarınıñ ricasından soñ Donbasta mahsus operatsiya başlana, dep bildirdi.
ABD prezidenti Joe Biden Rusiyeniñ Ukrainağa kerçekleştirgen «sebepsiz ücümini» takbih etti. Onıñ aytqanına köre, vaziyetni Beyaz Saraydan ve milliy telükesizlik hızmetiniñ muntazam haberlerini taqip etecek.
Ukraina prezidenti Volodımır Zelenskıy Cenk vaziyetini ilân etti.
Amerika istihbaratı Rusiye Ukrainağa ücüm ete bile, dep tenbilegen edi. Moskva Ukraina sıñırlarında tahminen 150 biñ arbiy ve tehnikanı topladı. Kreml, ücüm etecegini inkâr etken edi.
