Prezident ofisiniñ yolbaşçısı Andriy Yermak yolbaşçılığında ukrayin eyyeti ABD yañı saylanğan prezidenti Donald Trampnıñ vekilleri ile körüşti, dep haber ete Reuters.
Neşirniñ malümatına köre, eyyet Vaşingtonda Beyaz evniñ milliy telükesizlik meseleleri boyunca kelecekteki mesleatçısı Mayk Vals ve Ukrayina boyunca ABD mahsus temsilcisi Kit Kellogg ile körüşti. Reuters menbaları körüşüvde ne aqqında aytılğanı aqqında tafsilâtlı malümat bermedi.
Evel Ukrayina tış işler naziri Andriy Sıbiğa, prezident ofisiniñ yolbaşçısı Andriy Yermak, Trampnıñ taqımı ile bağ qurmaq içün resmiy ziyaretnen ABD-ne ketti, dep bildirgen edi. TİN başı qayd etti ki, Kıyiv, Donald Tramp memuriyeti işke başlağanda, Ukrayinağa Amerika tarafından destek devam etecegine ümüt ete.
ABD prezident saylavlarında Donald Tramp ğalebe qazandı, memuriyet deñişüvi ve akimiyetniñ berilmesi yanvarniñ 20-nde keçmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
