Ukraina prezidenti Petro Poroşenko prezident saylavlarınıñ ğalibi Volodımır Zelenskıy ile körüşmege añlaşqanını bildirdi, dep yaza Azatlıq Radiosı.
Poroşenkonıñ aytqanına köre, o, saylavlardaki raqibine telefon etip, Ukraina Merkeziy saylav komissiyası aydınlatqan rey berüvniñ resmiy neticilerinen tebrikledi.
Prezident öz video muracaatında Rusiye prezidenti Vladimir Putinniñ Ukraina vatandaşlarına qolaylaştırılğan yolnen Rusiye pasportlarını bermek qararı sebebinden sanktsiyalarnı quvetleştirmek kerek, dep ayttı. O, prezident vazifesinde qalğan müddet devamında bu meselege diqqat ayırmağa azır olğanını bildirdi.
«Bu problemniñ al etilüvini devam ettirmek ve toqtatmaq – yañı prezidentniñ mesüliyetidir. Şu sebepten küçlerimizni birleştirmek kerekmiz, dep tüşünem. Saylavlardaki reqabet keçmişte qaldı. Fırsattan faydalanıp, maña rey bergen 4,5 milliondan ziyade saylayıcığa teşekkür bildirmege isteyim. Amma şimdi epimiz, ukrainalılar, küçümizni birleştirip, Putinge Ukrainadaki keçici müddetni, akimiyetni demokratik berüv esnasını qullanmağa imkân bermemelimiz. Saylanğan prezident de buña qoltuta, dep inanam», – dedi Poroşenko.
O, Zelenskıy ile «eñ yaqın vaqıtta» körüşmege añlaşqanını bildirdi.
Aprelniñ 30-nda Merkeziy saylav komissiyası Volodımır Zelenskıynı 2019 senesi Ukraina prezidenti saylavlarınıñ ğalibi olaraq ilân etti. Oña aprelniñ 21-nde keçirilgen ekinci turda saylayıcılarnıñ 73,22%-ı rey berdi.
