“Vkontakte” içtimaiy ağında bir qaç repost içün milletlerara zıddiyet çıqaruvda qabaatlanğan Yalta sakini Elina Mamedovanıñ advokatı, cinaiy taqipniñ toqtatılması aqqında muracaat etti.
“Agora” halqara uquq qorçalayıcı gruppasınıñ advokatı Aleksey Ladin, vesiqa kopiyasını öz Facebook saifesinde derc etti.
Advokat, taqiqatqa muracaatında, 2018 senesiniñ soñunda qomşu Rusiyede Cinaiy kodeksiniñ 282 maddesine “cinayetni ilk sefer yapqan şahıslarnıñ cinayetçiligi yoq etilüvi” aqqında deñişmeler kirsetilgenini bildire.
Böyleliknen, Ladin, cinayet terkibi olmağanı icün, Elina Mamedovanı rusiye ekstremist ve terroristler cedvelinden çıqarılmasını ve cinaiy taqipnıñ toqtatılması aqqında muracaat ete.
Elina Mamedova advokatınıñ muracaatına binaen, Yalta taqiqatınıñ fikirleri şimdilik belli degil.
Daa evel Qırım uquq qorçalayıcı gruppasında, Rusiye mahkemeleri «içtimaiy ağlarda ekstremizm» içün üküm çıqarğan qırımlılar, Rusiye prezidenti Vladimir Putin «Rusiye Federatsiyası Ceza kodeksiniñ 282-nci maddesine deñişmeler kirsetilmesine dair» qanunnı imzalağan soñ, davanıñ tekrar baqılmasını talap ete bile, dep qayd etti.
Mamedovağa qarşı Rusiye Ceza kodeksiniñ 282-nci maddesiniñ 1-inci qısmı boyunca «VKontakte» içtimaiy ağında 2014 ve 2015 seneleri paylaşqanları içün cinaiy iş açıldı.
Qırımda ilhaqtan soñ rusiye quvetçileri, faalci ve jurnalistlerni ekstremizm maddesinen sebeplenip tutıp ala ve tevfiq ete. 282 maddeni çoqusı allarda içtimaiy ağlardaki layk ve repostlar, internette fikir isbatlav içün qabaatlap qullanalar.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
