Rusiye mahkemesi «qırımlı musulmanlar davası» boyunca sekiz yıl ve doquz ayğa üküm etken qırımlı Remzi Memetovnıñ yüksek qan basımı bar ve nevrolog ekiminiñ yardımına muhtac. Bu aqta «Qırım birdemligi» cemaat birleşmesi haber ete.
Qırımtatarınıñ ömür arqadaşı Elmira Memetovağa tarif etkenine köre, başı aylana, «közlerinde ekişerlene». Qan basımı 150/100.
«Sağ közü yaramay areket ete, apishanedeki ekim damar içine ine ve «Piratsetam» ilâcını berdi», – dep tarif etti Memetova.
Berilgen malümatqa köre, apishane feldşeri şahsiy nevrolog çağırmağa tevsiye etti, çünki köz problemi miy damarlarınen bağlı ola bile.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi. Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
