Rusiyeniñ Abakan şeerindeki №33 koloniyasında musulman mabüsleriniñ aqlarını bozalar, dep tarif etti advokatına Rusiye akimiyeti tarafından mahküm etilgen qırımlı vatandaş jurnalisti Remzi Bekirov. Bu aqta martnıñ 7-nde «Qırım birdemligi» cemaat birleşmesi haber etti.
Bu yıl fevralniñ 28-nden martnıñ 30-na qadar musulmanlar oraza tuta. Advokatnıñ aytqanına köre, İK-33-te müminlerge temçit ve iftarda aşamağa bermeyler.
Remziniñ ömür arqadaşı Halide Bekirovanıñ aytqanına köre, Abakanda saba saat beşte tañ ata. Koloniyada qavaltı eki-üç saattan soñ ola.
«Saba aşamağa imkânı yoq», – dep qoştı qadın.
O, Bekirov ve dindaşlarınıñ öz aşları olğanını da qayd etti, olarnı tükân yardımınen sımarış eteler. Lâkin qaravullar onı qapalı yerde saqlaylar, kündelik nizamnamede kösterilgen saatlardan tış musulman mabüslerniñ iç birisi aşqa irişmey.
«Aqları bozulmamasını, canına ve sağlığına telüke ketirilmeycek şekilde dinini kütmesine izin berilmesini istey. O, pek arıqladı, tezden iç de aşap olamaycaq. [Er sefer körüşüvlerde] o, apiske alınmazdan evelki fotoresimlerden daa arıq ve özüne oşamay», – dep qoştı advokat.
Bekirov cemaat namazını qılğanı içün yerleştirilgen ceza izolâtorından çıqtı ve SUSta buluna. Fevralniñ soñunda Rusiyeniñ idaresi altındaki Qırımnıñ Kiyev rayon mahkemesi Bekirovnı namaz qılğanı içün ceza odasına qapatuv davasını red etti. İmayeciler red cevabına itiraz bildirmege istey. Halide Bekirovanıñ aytqanına köre, aqayı kün devamında namazını qılıp olamay.
«Ne dua oquy, ne de oraza tutıp ola. O, aç qalmağa mecbur ola. Koloniyada musulmanlarnıñ diniy vazifelerini yapması içün iç bir türlü şarait yoq, amma, Rusiye anayasasına köre, olarda şaraitler teminlenmek kerek», – dep qayd etti Halide Bekirova. – «Etaptan soñ, ceza odasına bir qaç kere bulunğan soñ, pek arıqladı. Keçken sene uzun bir körüşüvde onıñ alını körip ağladım! O ve başqa musulmanlar açlıqtan öldürile ve maneviy basqığa oğray. Qaravullar olarnı aşalay, horlaylar. Ebet, bu sağlıqqa pek tesir ete».
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Aq qorçalayıcı teşkilâtlar Remzi Bekirovnıñ koloniyadaki sert tutuv şaraitleri sebebinden azat etilmesine irişmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
