Rusiye mahküm etken ve Hakasiyadaki №33 ceza koloniyasında tutulğan qırımlı vatandaş jurnalisti Remzi Bekirov saba namazını qılğanı içün beş künge ceza izolâtorına alındı. Bu aqta advokat Edem Semedlâyev «Qırım birdemligine» bildirdi.
Qayd etilgenine köre, qırımlınıñ ömür arqadaşı aqayından uzun vaqıt mektüp almağan. «Böyle fikirlerim oldı: aceba ceza izolâtorınamı qapatqanlar», – dedi Halide Bekirova.
Semedlâyev Bekirovnıñ Ceza izolâtorına alınğanını yanvarniñ 20-nde mahkeme oturışuvı vaqtında bildi, dep haber etti.
Siyasiy mabüs qayd etkenine köre, mabüs musulmanlar saba erte ibadet etkeni içün tüzetüv müessisesiniñ memuriyeti daa beş insannı iç nizam rejimini bozuv manaçığınen ceza izolâtorına avuştırğan.
İK-33-ke etap etilgen soñ yarım yıl içinde jurnalist yedi kere ceza izolâtorına qapatıldı: gece namaz qılğan ya da havlıda namaz qılğan, hadimnen selâmlaşmağan, şapka kiymegen.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Aq qorçalayıcı teşkilâtlar Remzi Bekirovnıñ koloniyadaki sert tutuv şaraitleri sebebinden azat etilmesine irişmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.