Rusiye tarafından mahküm etilgen qırımlı vatandaş jurnalisti Remzi Bekirov Rusiyeniñ apsinde 13 kilo arıqladı. Bu aqta «Qırım birdemligi» ömür arqadaşı Halideniñ malümatına esaslanıp bildirdi, o, altı yıldan soñ birinci kere aqayınen körüşip oldı.
«Aşamağan domuz etinden aş, yarım portsiyalar ve kündüz töşekke yaqınlaşuv yasağı – episi Remziniñ sağlığına tesir ete. Amma daa çoq oña koloniya hadimleriniñ maneviy basqısı tesir ete. Oña er vaqıt maneviy ceetten basqı yapmağa tırışalar», – dedi o.
Jurnalistni formal sebeplerden yedi kere ceza izolâtorına qapatqanlar: gece ya da havlı üstünde namaz qıldı, hadimge selâm bermedi, şapka taqmadı. Neticede Bekirovnı sert tutuv şaraitlerine qapatqanlar, o, anda eki aydan berli tutulmaqta.
Bekirov bulunğan Hakasiyadaki tüzetüv koloniyası Qırımdan beş biñ kilometrden uzaq yerleşe. Körüşüvge barmaq içün yol üç kün sürdi.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
