Bekirov bu koloniyağa avgustnıñ 12-nde ketirildi ve onı birden karantinge alğanlar. Lâkin yarım kün keçmedi erkek ceza izolâtorına qapatıldı. O künden berli andan çıqmay dep aytmaq mümkün, onı beş, altı, doquz kün tutalar.
ZMINA malümatına köre, Bekirov ceza izolâtorına altı kere alındı.
«Beş, altı künden soñ andan çıqsa, o künü onı bir manaçıq tapıp kene anda yollaylar. Yani ceza izolâtorından çıqmay demek mümkün», – dep qayd etti neşir.
Qırımtatarınıñ ceza izolâtorına alınmasınıñ sebepleri arasında – başına bir şey taqmağanı, koloniya hadiminen selâmlaşmağanı, töşekke yatmayıp, ibadet etkenidir.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
