«Qırım birdemliginiñ» faalleri Remzi Bekirov koloniyada basqığa oğray, onı ceza izolâtorına yerleştirgenler, qorantasınen qonuşması yasaqlandı, oña uyğun olmağan munasebette bulunalar, dep bildirdi.
Rusiye memurları tarafından insan aqlarınıñ ciddiy bozuluvı sebebinden aq qorçalayıcıları Rusiye akimiyetine, halqara teşkilâtlarğa ve tış memleketlerniñ ükümetlerine muracaat etti. Hususan, Ukrayina ükümet organlarından da talapları oldı:
- Tüzetüv koloniyasınıñ memuriyetine Bekirovnıñ aqları yerine ketirilgenini teşkermek muracaatınen bulunmaq;
- Bekirovnı deñişüv cedvellerine kirsetip, azat etüv meselesini ileriletmek;
- Qanunsız tutuluv ve siyasiy mabüske qarşı adaletli mahkeme standartlarınıñ kerine ketirilmegenini semereli bir şekilde tahqiq etilüvini temin etmek.
Muracaatnı ZMINA İnsan aqları merkezi, Qırım aq qorçalayıcı gruppası, Kreml siyasiy mabüsleriniñ soy-sopları birleşmesi, «KrımSOS», Vatandaş serbestlikleri merkezi, «Qırım» insan aqları evi» cemaat birligi ve Halqara PEN-klubınıñ Ukrayina bölügi.
«Mabüslerni işğal etilgen topraq tışına çıqarmaq arbiy cinayet ola. Şahıs cinayet yapsa bile, onı işğal etilgen topraqta mahküm etmek kerekler ve cezasını tek anda çekmeli», – dep ayta Yevğen Yaroşenko, KrımSOS talilcisi.
Onıñ qayd etkenine köre, uzaq olğanından qorantalar mabüslernen bağda olamay. Çeşit şahsiy şikâyetlerde siyasiy mabüsler daimiy qoranta bağlarını qorumalı dep qarar çıqarğan Avropa insan aqları mahkemesiniñ qararları bozula.
Avropa insan aqları mahkemesi iyün ayında «Ukrayina Rusiyege qarşı (Qırımnen bağlı)» devletlerara davası boyunca soñki qararnı qabul etkende Rusiye qırımlı mabüslerniñ işğal etilgen yarımadağa telükesiz qaytmasını acele temin etmeli dep ayrı maddede qayd etti.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
