Rusiye tarafından mahküm etilgen qırımlı vatandaş jurnalisti Remzi Bekirovnı Rusiyeniñ Krasnoyarsk ülkesi Yeniseysk №2 apishanesinden Qırımğa yaqın koloniyağa avuştırmadılar. Bu aqta fevralniñ 27-nde Bekirovnı ziyaret etken advokatı «Qırım birdemligine» bildirdi.
Berilgen malümatqa köre, Cezalarnı yerine ketirüv federal hızmeti fevralniñ 24-nden başlap Rusiyeniñ sekiz regionındaki apishanelerde «cevapnıñ orta seviyesi» kirsetilgeni içün Rusiyeniñ Rostov vilâyetindeki koloniyağa avuştırmadı. Qomşu Stavropol ülkesine Remzi Bekirovnı avuştırmağa razı olmadılar.
Bundan ğayrı, Bekirov etap müddetiniñ apis müddetine esaplanmasına irişip olamay.
O, qadılar etap etilüviniñ müddetini apis müddetine saysınlar dep, Çitanıñ 2-nci Şarqiy okrugınıñ arbiy mahkemesine memuriy dava yolladı. Lâkin Çita mahkemesi öyle de cevap bermedi. 2023 senesi sentâbr ayında Bekirov bu müddetke SİZOda keçirgen künleri qoşulmasını talap etip, maqsadına irişti.
Qadılar yañıdan kün saymağa qarar berse, Bekirov mart ayında sert rejimli koloniyağa avuştırıla bile. Olmasa – tek iyün ayında.
Remzi Bekirov – vatandaş jurnalisti, «Qırım birdemliginiñ» faali. Jurnalist Qırım sakinlerine qarşı siyasiy sebepli davalarnıñ tintüv ve mahkemelerni köstergen edi. Olarnıñ arasında «Veciye Kaşka davası», arhiyepiskop Kliment, «Hizb ut-Tahrir» davaları ve digerleri bar. Remzi Bekirov qırımlı siyasiy mabüslerniñ qorantalarına yardım ğayesiniñ teşebbüsçisi ola.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
