Vatandaş jurnalisti Remzi Bekirov Krasnoyarskqa etap etildi, dep bildirdi ömür arqadaşı Halide Bekirova.
O, aqayından alğan mektüpniñ bir qısmını derc etti. «Şimdi Çelâbinsk şeeriniñ SİZOsında bulunam. Bu künleri Krasnoyarsk şeerine doğru yolum devam etecek, anda yapmağan bir cinayet içün cezamnı çekecem», – dep bildirdi Bekirov.
Onıñ aytqanına köre, mayısnıñ 28-nde o, Novoçerkassk SİZOsından Voronej tarafına çıqtı. «Yolda olğanlar filmde körgenlerime oşadı: silâlı konvoy, sert bir ses, avlağan köpekler, bizni qırçmanen bağlağan zıncır, nefes almağa çaresi olmağan penceresiz Stolıpin vagonı ve mabüslerniñ aqsızlığı. Tren, avtozak kibi, sıcaq ve avasız edi. Vagonımız rıqma-rıq tolu edi», – dep ayttı Bekirov.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
