Daa balalıqta halqımnıñ Qırımdan mecburiy sürgün etilmesi aqqında çoq ikâye eşitken edim. Mektepte, yılda bir kere, mayısınıñ 18-nde sükünet daqqaları ola edi. Facianı öz közünen körgen, öz başından keçirigen qartlar közyaşlarını tutamay edi. Şu künü Qırımda matem mitingleri keçirile edi. Böyle şey bir daa tekrarlanmaz, dep tüne edim. Amma yañıldım...
2020 senesi dekabrniñ 20-nde menim sürgünim başlandı. Saba meni kameradan çıqardılar. Tintüvden soñ avtozakqa oturttılar. Çaresizlik ve küçsüzlik duyğusı raatlıq bermey edi. Avtozakta mennen dostum ve qabaat ortağım Cemil Ğafarov edi. Meni ve Cemil ağanı ayrı ufaq ve demirli kameralarğa oturttılar.
Yol uzun ve qıyın edi. Tahta skemlelerimizde bizim duyğan er bir töpelerden ğayrı, demir qafeslerniñ qapıları da yuqlamağa keder ete edi. Amma eñ qıyını bu degil edi. Bizim demirden kameralarımızda pek suvuq edi. Qızdırmaq kerek olğan soba bozulğan edi, tışarıda ise 20 derece suvq edi. Bundan ğayrı tışarıda daa şiddetli ve buzlu yel ese edi. Suvuqtan üşüp, men tüşüncege daldım... Ailemni, dostlarımnı, acayip ülkemi endi ne vaqıt körerim? Maña ve halqıma qarşı yapılğan bu adaletsizlik ne zaman biter? Ne içün meni tuvğan yerlerimden bu qadar uzaqqa alıp keteler?
1944 senesi mayısta öz evlerinden quvulğan atalarım ne qadar qıynaldı! Yolda açlıqtan ve hastalıqtan ne qadar adam öldi! Yañı yerlerde nasıl zor edi! Aqlıma sürgünlikni öz közünen körgenlerniñ hatırlavları kele edi: «Bizni Allah olğan yerge alıp ketecekler». O bizni qaldırmaz! Yürekten çıqqan iman atalarıma yardım etti. Allahqa işanç bugün de bütün sıñavlardan keçmege yardım eter.
Yorulğan, ayaqta zornen turğan qart siyasiy mabüslerniñ alı fena edi
Gece bizni Krasnodardaki 1-nci SİZO-ğa ketirdiler. Bizni qayd etip başladılar. Soñra kirli kameralarğa oturttılar. Pek yorğun edik, bu yoldan soñ biraz çay içip qızınmağa istey edik. Ne çay, ne qızınuv olmadı, bunıñ yerine yañı sınavlar başlandı. SİZO hadimleri yataq çamaşırı berilgen odağa bizni alıp kettiler, anda sabağace oturdıq. Skemleler yoq edi. Yorulğan, ayaqta zornen turğan qart siyasiy mabüslerniñ alı fena edi. Kimge şikâyet eteyik, iç bir kimsege biz kerekmey edik.
Ne ise bizni kameralarğa yerleştirip başladılar. Ağır çantalarımıznen, bir-birimizge yardım etip bir qattan ekinci qatqa ene edik. Merdiven tar olğanı içün çetten kete edik. Allah muqaddes Quranda dey ki: «Er ağırlıqtan soñ, yengillik kele». Kerçek bu sözler. Bütün sınavlardan soñ, saba saat altılarda men 176 kamerağa kirdim ve anda oturğanlar meni pek yahşı qarşılap aldılar. Apishane adetlerine köre, maña sıcaq çaynen tatlılıqlar berdiler. Ve biraz olarnen laf etken soñ men yuqlamağa yattım.
Год в СИЗО: история «второй симферопольской группы Хизб ут-Тахрир» (фотогалерея)
Krasnodardaki şarait Aqmescit SİZO-sından daa yahşı edi. Büyük, qıntavlı kamera, ayaqyol qapunen, kamerada oturğanlar da yahşı ediler – Aqmescit SİZO-sında mına bu episi yoq edi. Bir ay Krasnodarda edim, anda er kesnen dostlaştım. Menen beraber öldürüv, qızsızlav ile suçlu olğanlar otura edi. Bazılarnıñ apishanege tüşmenen bağlı kederli ikâyeleri bar edi.
Mına bu olardan biri. Apisli Vladimir, otuz yaşındaki adiy rus oğlan, o, kendini ve qız arqadaşını sarğoş sportçudan qorçalağanı içün sekiz buçuq yıl apis cezasına mahküm etilgen... Buña oşağan daa başqa ikâyeler de bar edi. Çoqusı apisliler Rusiyeniñ adaletsiz mahkeme sistemasını tenqit ete ediler.
Vagonğa köterilgende, sol ve sağ taraftan avtomatlarnen konvoyerler tura, köpekler afıra
Bir aydan soñ etap, daa doğrusı sürgünim devam etti. Adetince, tintüvler, avtozakqa oturtuv. Biraz vaqıt keçken soñ biz Krasnodar şeeriniñ demir yolunda edik. Meni ve diger apislilerni trenniñ vagonlarına yüklep başladılar. Vagonğa köterilgende, sol ve sağ taraftan avtomatlarnen konvoyerler tura, köpekler afıra. Bu vaqıt, "Haytarma" filminden kadrlar aqlına kele. Şükür, halqım 1944 senesi başından keçirgen bütün deşetni men de yaşamadım. Amma bir ande, men de şu ağrı ve aqaretni duydım.
Şidmi XXI asır. Qırımtatarlarnıñ, Qırım musulmanlarınıñ Rusiye apishanelerine sürgüni devam ete.
Yoldaşım pek yahşı insan edi – dostum Veli. Onen beraber aş paylaştıq, bir-birimzge destek bilidrdik, dert paylaştıq. Bir buçuq künden soñ Rostov-na-Donu şeerinde edik. Andaki demir yol vokzalında aynı vaziyet edi: köpekler, avtomatlar... Avtozaka stakanlarına yüklep, bizni 1-nci SİZO-ğa ketirdiler. Anda adaletsizlikke qarşı küreşimiz devam etti.
Şidmi XXI asır. Qırımtatarlarnıñ, Qırım musulmanlarınıñ Rusiye apishanelerine sürgüni devam ete. Amma men eminim, atalarımız Vatanına, Qırımğa qaytıp kelgenleri kibi, biz de Kreml mabüsleri erte-keç öz evlerimişçge qaytrımız.
Рисунок как способ поблагодарить. Что рисуют крымские политзаключенные в неволе (фотогалерея)
Remzi Bekirov cemaat jurnalisti, aq-uquq qoruyıcılar onı siyasiy mabüs dep ilân ettiler
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 insan tutuldı. Cemil Gafarov da olardan biri ola. Aqmescitniñ Kiyev rayon mahkemesi episini apiske aldı.
Rusiye kontrolindeki Qırım Yuqarı mahkemesi Aqmescitteki «Hizb ut-Tahrir davası» altı mabüsiniñ – vatandaş jurnalisti Remzi Bekirov, faaller Farhod Bazarov, Şaban Umerov, Cemil Gafarov, Raim Ayvazov ve aq qorçalayıcı Riza İzetovnı apiste tutuv müddetini 2021 senesi yanvarniñ 14-ne qadar uzattı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.