Kurbedinovnıñ aytqanına köre, Bekirov koloniyağa avuştırılğan soñ bir qaç kere sebepsiz bir şekilde ceza izolâtorına qapatılğan edi. Koloniya memuriyeti oña mektüp yazmağa ve tuvğanlarına telefon etmege yasaqlay.
Advokat qayd etkenine köre, siyasiy mabüsniñ evden uzaq olması – 4,5 kilometr mesafede – onıñ «qoranta bağlarını qoruv aqqını boza». Jurnalistniñ ailesi körüşüvge barıp olamay, çünki em zor, em paalı ola.
Kurbedinov Hakasiyadaki iklim sıcaq Qırım ikliminden pek farqlı, dep qayd etti, bu da qırımlınıñ «sağlığı içün ciddiy bir şey ola».
«Yaqın Rusiyede ziyalılarğa qarşı yapılğan bir sürgün çeşitidir», – dep qoştı Emil Kurbedinov.
Bir ay evelsi Bekirov Rusiyeniñ Krasnoyarsk ülkesi Yeniseysk №2 apishanesinden çıqarıldı. Rusiyeniñ Cezalarnı yerine ketirüv federal hızmeti evine yaqın koloniyağa avuştırmağa razı olmadı. O, Rusiyeniñ Rostov vilâyetinde olmağa istegen edi. Lâkin Rusiyeniñ Cezalarnı yerine ketirüv federal hızmeti 2022 senesi fevralniñ 22-nden başlap Rusiyeniñ sekiz regionındaki tüzetüv müessiselerinde «orta cevap seviyesi» kirsetildi, şu sebepten onı anda avuştırmağa imkânsız ola, dep bildirdi.
Siyasiy mabüsni qomşu Stavropol ülkesine avuştırmağa razı olmayıp, mabüs etap etilgen soñ yerge itiraz bildirile bile, dep aytıldı.
Remzi Bekirov — vatandaş jurnalisti, «Qırım birdemliginiñ» faali. Jurnalist Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp bardı, şu cümleden «Veciye Kaşka» davası, arhiyepiskop Klimentniñ tutuluvı, «Hizb ut-Tahrir» ve diger davalar. Remzi Bekirov Qırım siyasiy mabüsleriniñ qorantalarına yardım etmek ğayesiniñ teşebbüsçisidir. Çağına yetmegen üç balası bar.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
