Rusiye mahküm etken qırımlı vatandaş jurnalisti Remzi Bekirov Rusiye Federatsiyasındaki Krasnoyarsk SİZOsından çıqarıldı ve Rusiyeniñ Hakasiya Cumhuriyetiniñ paytahtı Abakan şeerindeki №33 tüzetüv koloniyasına etap etile. Bu aqta «Qırım birdemligi» cemaat birleşmesi ömür arqadaşı Halide Bekirovağa yazğan mektübine esaslanıp haber ete.
Bekirov bildirgenine köre, o, daa Abakannıñ №1 tahqiqat izolâtorında buluna. Avgustnıñ 4-nde onı «stolıpin» vagonında Krasnoyarsktan etap etkenler. Bekirovnıñ qayd etkenine köre, «baqılıp trenge mindirilgen» soñ «yolda çoq şey oldı». Tam olaraq ne aqta aytıla bildirmedi.
Abakan SİZOsında Bekirov üç künden altı künge qadar qalacaq – nezaretçiler böyle ayttı. Soñra ise onı bu şeerde olğan №33 tüzetüv koloniyasına yollaycaqlar.
«Bu nizamlı lagerniñ öz hususiyetleri bar. Cezalarnı yerine ketirüv federal hızmeti meni Qırımğa evge yaqınca yollamağa istemeydir», – dep yazdı qırımlı ömür arqadaşına.
Remzi Bekirovnıñ apayına daa evel bildirgenine köre, 2024 senesi iyulniñ 5-nde onı Rusiye Federatsiyası Krasnoyarsk ülkesindeki Yeniseysk şeeriniñ №2 apishanesinden çıqarmağa planlaştıralar.
Halide Bekirova Yeniseyskteki №2 apishane yolbaşçısı vazifelerini eda etken Yevgeniy Laringe mektüp yazıp, aqayı angi koloniyağa ketecegini aytmasını rica etti. İyülniñ 10-nda qadın bu malümat berilmeycegine dair cevap mektübini aldı.
Aynı mektüpni Halide Bekirova Krasnoyarsk ülkesindeki Cezalarnı yerine ketirüv federal hızmetiniñ Baş idaresine yolladı. Bekirovnıñ vaqtınca Krasnoyarsk şeerindeki SİZO-1-de bulunğanı belli oldı.
Rusiye Federatsiyasınıñ Cezalarnı yerine ketirüv federal hızmeti Remzi Bekirovnı evine yaqın koloniyağa avuştırmağa razı olmadı. O, Rusiyeniñ Rostov vilâyetinde qalğan cezanı çekmege istedi. Lâkin Cezalarnı yerine ketirüv federal hızmeti fevralniñ 24-nden başlap Rusiyeniñ sekiz regionındaki tüzetüv müessiselerinde «orta cevap seviyesi» kirsetildi, şu sebepten onı anda avuştırmağa imkânsız ola, dep bildirdi. Siyasiy mabüsni qomşu Stavropol ülkesine avuştırmağa razı olmayıp, mabüs etap etilgen soñ yerge itiraz bildirile bile, dep aytıldı.
Remzi Bekirov — vatandaş jurnalisti, «Qırım birdemliginiñ» faali. Jurnalist Qırım sakinlerine qarşı siyasiy sebeplerden açılğan davalar boyunca tintüvler ve mahkemelerniñ yayınlarını alıp bardı, şu cümleden «Veciye Kaşka» davası, arhiyepiskop Klimentniñ tutuluvı, «Hizb ut-Tahrir» ve diger davalar. Remzi Bekirov Qırım siyasiy mabüsleriniñ qorantalarına yardım etmek ğayesiniñ teşebbüsçisidir. Çağına yetmegen üç balası bar.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
