Rusiyeniñ Hakasiya cumhuriyetindeki Abakan şeeriniñ tüzetüv koloniyasında tutulğan Rusiye tarafından mahküm etilgen qırımlı Remzi Bekirovğa namaz qılmağa berilmey. Namaz qılğanı içün onı ceza izolâtorına qapatalar. Bu aqta ömür arqadaşı Halide Bekirova Facebook saifesinde haber etti.
Onıñ aytqanına köre, fevralniñ 20-nde Bekirovnıñ ceza izolâtorında qanunsız tutuluvınen bağlı mahkeme oldı. Apayı aqayınıñ oturışuv vaqtında yapqan çıqışınıñ bir qısmını derc etti:
«Ögümde bir saylav bar: ya ibadet etip, ceza izolâtorında cezasını çekmek, ya da ibadet etmeyip, Qıyamet kününde cezasını çekmey. Soñki sözümde «apishaneler imanımıznı yoq etemezler», dep aytqan edim. Bunı isbatlap olurım, dep ümüt etem. Ümüt etem ki, cemaatçılıq mında, koloniyada olğalarğa qulaq asar. Mında aytılğan din serbestligine riayet etilmey. Cemaat teşkilâtlarına muracaat etip, bizge namaz qılmağa ve oraza tutmağa izin bersinler dep, meseleni çezmege rica etem. Bu esas aqlarımız. Aqqımız bar», – dedi Remzi Bekirov mahkemede. Mahkeme qarar aldımı ömür arqadaşı bildirmedi.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Aq qorçalayıcı teşkilâtlar Remzi Bekirovnıñ koloniyadaki sert tutuv şaraitleri sebebinden azat etilmesine irişmege çağıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
