Rusiyeniñ Abakan şeerindeki №33 tüzetüv koloniyasında tutulğan Rusiye mahküm etken jurnalist Remzi Bekirov aman-aman üç aftadan berli qorantasınen bağğa çıqmay.
Bu aqta ömür arqadaşı Halide Bekirova «Qırım birdemligi» cemaat birleşmesine haber etti.
Onıñ aytqanına köre, Remzi Bekirov soñki mektübini oktâbrniñ 2-nde yazı, eki buçuq aydan berli ise ailesine telefon etmey.
«Apayı olaraq onıñ içün pek qasevetlenem. Ne alda, qayda olğanını bilmeyim, onı ceza izolâtorındamı tutalar bilmeyim. Oktâbrniñ 2-nde soñki mektübini yazğanından evel ceza izolâtorında tutulğan edi, em de bir sebep olmağanda», – dep tarif etti Halide Bekirova.
Onıñ qayd etkenine köre, o, prokuratura ve Cezalarnı yerine ketirüv federal hızmetine şikâyetler yazdı ve müessiselerniñ cevabını bekley.
«Bir şeyler yapsınlar, aqayımı basqı yapmasınlar, dep talap etem. <…> Bu [basqı] fikirleri sebebinden yapıla, dep tüşünem, siyasiy mabüs, jurnalist olğanı içün», – dep qoştı Remzi Bekirovnıñ apayı.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
