Qırım Muhtar Cumhuriyetiniñ quruluvı aqqında 1991 senesiniñ referendumı Kreml reberleriniñ yarımadanı Ukrayınadan uzaqlaştıruv imkânını yedeklemek usulı edi. Bu aqta qırımtatar halqınıñ lideri, Ukrayına halq deputatı Mustafa Cemilev Qırım.Aqiqatqa bergen intervyüsında ayttı.
«Belli olğanına köre, 1991 senesi yanvar ayında referendum keçirüv teşebbüsi Sovetler Birligi Kommunist firqasınıñ Merkeziy komitetine ait edi. Sovetler Birligi dağılmazdan evel Kreml reberleri Qırımnı Ukrayınadan ayıruv imkânını bu şekilde yedeklegen edi. Ve referendumda «Sovetler Birliginiñ subyekti ve ittifaq añlaşmasınıñ iştirakçisi olaraq Qırım Muhtar Sovet Sotsialistik Cumhuriyetiniñ ğayrıdan tiklenüvine qoltutasıñızmı?» bu planlarğa pek uya edi», – dep qayd etti o.
Cemilev, qırımtatar halqı rey bermedi ve Ukrayına akimiyetini bu ğayeden vazgeçmesine çağıorğan edi, dep qoştı.
«O vaqıt da referendumnı boykot etken edik, birinciden, Qırımnıñ tamır halqınıñ büyük qısmı sürgünlik yerlerinde qalğan edi ve Rusiyeden ketirilip yerleştirilgenlerniñ olarnıñ vatan statusını belgilemege aqqı yoq, ekinciden, aslında Rusiye separatizminiñ yuvası ve Ukrayına bütünliginiñ telükesi olacaq rus muhtariyetiniñ qırımtatarlarnıñ vatanında quruluvı aqqında aytıla. Amma bizni diñlemediler. Ukrayına Yuqarı Radasınıñ sessiyasında Qırım Muhtar Sovet Sotsialistik Cumhuriyetiniñ quruluv qararı alınğanda deputatlarnı Qırım vekilleriniñ bu sessiyada muhtariyetniñ quruluv ihtiyacı ruslar toplu yaşağan Ukrayınanıñ yekâne regionı dep delil ketirgeni şübhelendirmedi», – dep añlattı halq deputatı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
