Qırımtatar Milliy Meclisiniñ reisi Refat Çubarov Qırım.Aqiqat Radiosınıñ yayınında Rusiye kontrolindeki Qırım Yuqarı mahkemesiniñ ğıyabiy ükmüni «uquq ceetinden faydasız» dep adlandırdı. İyünniñ 1-nde Aqmescitteki mahkeme onı 2014 senesi fevralniñ 26-nda Qırım parlamenti ögündeki «qalabalıqlarnı teşkil etkeninde» qabaatlap, altı yıl apis cezasına ve para cezasına üküm etti.
«Bu qarar uquq ceetinden faydasızdır, çünki Rusiye işğalci mahkemesi tarafından çıqarıldı. Bu davada teşebbüsçi olğan ve onı uydurğan insanlar ve bugün qararnı seslendirgenler – cinayetçi ola, episini ceza bekley», – dep ayttı Çubarov.
Qırımtatar Milliy Meclisiniñ reisi Rusiyeniñ İnterpolğa muracaat etip, onıñ Rusiye akimiyetine teslim etilmesini istey bilecegini izaatladı.
«Böyle şeyler olğan edi, Rusiye meni bizim toprağımızdan vaqtınca Rusiye tarafından işğal etilgen kene bizim toprağımızğa quvdırmağa çoq istegen edi. Amma İnterpol razı olmadı, Rusiye kene muracaat etse, İnterpol red eteceginden şübhelenmeyim», – dep tüşüne Çubarov.
Onıñ aytqanına köre, mahkeme qararı Avropa insan aqları mahkemesinde «bütün Rusiye mahkemelerinden keçken soñ» şikâyet etilecek.
«Bu qarar Avropa insan aqları mahkemesinde ve Osokin (tayinlengen advokat – QA) tarafından şikâyet etilecek. Bu adaletke irişmek içün yapılacaq, çünki işğalci mahkemenen davalaşamız, anda adalet zaten olmaz. Böyle mahkemeniñ maqsadı – işğalge qarşılıq köstergenlerni cezalamaqtır. İlerideki tedbirlerden, hususan Avropa insan aqları mahkemesinden, bu qanunsız dava tizilüviniñ bütün tafsilâtları, qanunsız tahqiqat tedbirleriniñ keçirilüvi, maña qarşı cinayetnen alâqası olğan er kes belli olacağını bekleymiz, imkân olsa, er kes cezasını çeksin», – dedi Çubarov.
Üküm çıqarılğan soñ Qırımtatar Milliy Meclisiniñ tayinlengen advokatı Aleksandr Osokin da ğıyabiy ükümni şikâyet etecek, dep bildirdi. Ukraina Tış işler naziriniñ birinci muavini Emine Ceppar işğal etilgen Qırımda Qırımtatar Milliy Meclisiniñ reisi Refat Çubarovğa qarşı esnasnı ve çıqarılğan ğıyabiy ükümni «ayıp mahkeme» dep adlandırdı.
Qırım Muhtar Cumhuriyeti ve Aqyar prokuraturası Çubarovğa qarşı mahkeme ükmüni «qanun ve cenk adetleriniñ bozuluvı» olaraq tasnif etti.
Çubarov Qırım.Aqiqat Radiosınıñ yayınında Aqmescitte çıqarılğan mahkeme ükmüni «uquq ceetinden boş» dep adlandırdı. O, Avropa insan aqları mahkemesine muracaat etmege niyetlene, dep bildirdi.
Mayısnıñ 24-nde olıp keçken oturışuvda qabaatlav Çubarov içün 9 yıl apis cezası berilmesini istedi. Meclis reisi qabaatlav tarafınıñ talabını izaatlap, Qırımdaki «mahkeme» onıñ ayatına tesir etmeycek, dep ayttı.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyül ayında Aqmescitteki mahkeme Çubarovğa qarşı cinaiy davanı temelden baqıp başladı. Tayin etilgen advokat Aleksandr Osokin Qırımtatar Milliy Meclisiniñ reisine qarşı mahkemeni şikâyet etti.
Çubarovnıñ qayd etkenine köre, Rusiye akimiyeti «qırımtatar halqına qarşı yañı repressiya dalğasını başlattı».
Ukraina Yuqarı Radasınıñ İnsan aqları vekâletlisi Lüdmila Denisova bu davanı qanunsız dep adlandırdı.
Qırım Muhtar Cumhuriyeti ve Aqyar prokuraturası Rusiye tahqiqatçılarınıñ Çubarovğa qarşı açqan cinaiy dava sebebinden tahqiqat başlatqan edi.
