Qırımtatar Milliy Meclisiniñ reisi Refat Çubarov qırımlılarnı yarımadada ola bilecek cenk vaziyetinde telükesizlikni temin etmek içün sermiya azırmağa çağırdı. O, Qırımdaki patlavlarnı izaatlap, yarımadanı farqlı yollarnen azat etecekler, dep ayttı.
«Er şey insanlarğa Qırımnıñ azat etilüvini beklemek kerek olğanını köstere. Er kes Qırım cebe sıñırında olğanını añlay. Bunı aytıp, Qırımnıñ azat etilüvine azır olsunlar deymiz, özüniñ, tuvğanlarınıñ telükesizligini temin etmek içün sermiya azırlasınlar, dep aytamız», – dep qayd etti o, Ukrayına milliy telemarafonı yayınında.
Refat Çubarovnıñ qayd etkenine köre, Qırımğa kirgenlerniñ sayısı bayağı eksildi ve mal-mülk satın alğan ya da yarımadada qurucılıqqa yatırım yapqanlar yoq. Meclis reisiniñ fikirince, evlerini satmağa istegenlerniñ sayısı pek arttı.
«İşğalci akimiyet er şeyni gizlemege tırışa. Patlav, ücüm ve ilâhre. Amma zemaneviy tehnologiyalar ve tehnika bar. Bir-eki künge malümatnı yavaşlatıp olsalar da, uydu fotoresimleri peyda ola», – dep tarif etti o.
«KrımSOS» talilcileri soñki eki aftada Qırımda tek eki kün Rusiye logistik infrastrukturasına qarşı ücümsiz keçti, dep saydı.
Kütleviy haber vastaları ve Qırım telegram kanallarınıñ malümatına köre, soñki patlav avgustnıñ 2-nde Sarabuz (Gvardeyskoye) qasabasında oldı. Anda Rusiye Federatsiyasınıñ Ava-kâinat quvetleriniñ aviabazası buluna.
Rusiye işğal etken Qırımğa muntazam sürette ücüm etile. Rusiye akimiyeti Ukrayına ordusını qabaatlay ya da talimler aqqında bildire. Kyiv resmiy şekilde tek bazı ücümlerge alâqası olğanını tasdıqlay.
Ukrayına Milliy telükesizlik ve mudafaa şurasınıñ kâtibi Oleksiy Danılov memleketniñ Telükesizlik hızmetiniñ Qırım (Keriç) köprüne endirilgen eki darbege de alâqası bar, dep bildirdi.
Mayısnıñ 10-nda Azatlıq Radiosınıñ leyhası olğan Qırım.Aqiqatjurnalistleri 2014 senesi Rusiye tarafından işğal etilgen Qırım yarımadasınıñ Rusiye Federatsiyasınıñ 223 çalışqan, muvaffaq ve qapalı arbiy obyektleriniñ haritasını derc etti. Anda iyülniñ 19-nda patlav ve yanğınlar olğan «Starokrımskiy» poligonı da qayd etilgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
