Avgustnıñ 16-sında saba saatlarında işğal etilgen Qırımnıñ Canköy rayonında patlav sesleri eşitilgen. Bunı Qırımtatar Milliy Meclis reisi Refat Çubarov haber etti.
"Muvaqqat işğal etilgen Qırımdan haber etile: ruslarnıñ Canköy rayonınıñ Qalay qasabasındaki arbiy qısımına mergin uruv. Patlav sesleri bir saattır eşitile...", -dep yazdı o Facebookta.
Biraz soñra Çubarov arbiy yedekler anbarına urulğanını bildirdi.
Yerli "Krımskiy veter" neşri Qırımnıñ Canköy rayonında yanğın aqqında haber etti.
"Yerli neşirlerniñ bildirgenine köre, Canköy rayonında elektrik stantsiya yana. Bizim menbalarımıznıñ malümatına köre, arbiy yedeklker anbarı yana", -dep yazıla bildirmede.
"Qırım.Aqiqat"nıñ buña dair tasdıqlanğan malümatı yoq. Ukrayina ve Rusiye Mudafaa nazirlikleri bu malümatına şimdilik daa izaatlamadılar. Muarririyet malümatnı teşkermege devam ete.
Avgustnıñ 9-nda yerli media Rusiye işğal etken Qırımnıñ Saq şeeri yaqınlarında Novofedirivkadaki arbiy uçaq alanında patlavlar aqqında bildirdi.
Rusiye akimiyeti «qomşu evlerden» tahminen 30 kişi tahliye etildi, dep bildirdi. Umumiy tahliye olmadı. Onlarnen mesken ev zarar kördi.
Rusiye Mudafaa nazirligi Novofedirivkadaki uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. Yoq etilgen tehnika körüngen yoldaş fotoresimlerine baqmadan, Rusiye arbiyleri uçaqlar zarar körmedi, dep bildire.
Ukrayına Mudafaa nazirligi Novofedirivka qasabasındaki arbiy uçaq alanında olğan patlavlarnı izaatlap, «yanğınlarnıñ sebebini bilmey», dep bildirdi. Ukrayına silâlı quvetleri Novofedirivkadaki aerodromda patlavlarnen alâqası olğanını resmiy şekilde tasdıqlamadı.
Ukrayına prezidenti ofisiniñ yolbaşçı muavini Mıhaylo Podolâk Kyivniñ Qırımnıñ Saq rayonındaki Novofedirivkada olğan arbiy aerodromda patlavlarnen alâqası yoq, dep ayttı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
