Rusiye 8 yılğa mahküm etken Yaltadaki «Hizb ut-Tahrir davasının» mabüsi Refat Alimov azatlıqqa çıqtı. Bu aqta advokat Edem Semedlâyev «Qırım birdemligine» bildirdi.
«Şimdi birinciden tuvğanlarım ve yaqınlarımnı körmege isteyim. Niayet raatlanmaq, tedaviylenmek. Soñra işke kirmege isteyim. Soñki sekiz yılda anam özü çalıştı. Men apiste olğanda halqımız yardım etti. Şimdi çıqıp çalışmaq kerek. Böyle vaziyette olğan diger insanlarğa yardım etmek kerek», – dep qayd etti Alimov.
Rostov-na-Donudaki Cenübiy okrugınıñ arbiy mahkemesi 2019 senesi Refat Alimovnı 8 yılğa, Müslim Aliyevni 19 yılğa, İnver Bekirovnı 18 yılğa, Emir-Usein Kukunı 12 yılğa, Vadim Siruknı 12 yılğa, Arsen Cepparovnı 7 yılğa azatlıqtan marum etti.
Amnesty International Yaltadaki «Hizb ut-Tahrir davasının» bütün mabüslerini vicdan mabüsi dep adlandırdı.
Amnesty International Rusiye bölüginiñ vekili Aleksandr Artemyev bu ükümni «siyasiy taqip» dep adlandırdı.
Dava mabüsleri 2016 senesi fevral-aprel aylarında Yaltada tutuldı. Olarnı Rusiyede yasaqlanğan «Hizb ut-Tahrir» islâm siyasiy firqası ile alâqaları bar olğanında qabaatladılar.
«Memorial» Rusiye aq qorçalayıcı merkezi beş qırımlını siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
