Soçideki Üçünci istinaf mahkemesiniñ qadıları prokuror Yelena Barsukovanıñ Qırımtatar Milliy Meclisiniñ reisi Refat Çubarovnıñ advokatı Nikolay Polozovnı uzaqlaştırmaq muracaatını qanaatlendirdi.
Bu aqta advokat Nikolay Polozov Qırım.Aqiqat mühbirine bildirdi.
«Oturışuv başında prokuror Barsukova meni mahkeme oturışuvında iştirak etüvden uzaqlaştırmaq içün muracaatta bulundı. Sebep daa evel bu cinaiy davanıñ mabüsi olğan Ahtem Çiygoznı qorçalağanım oldı. Ahtem Çiygoz, Refat Çubarovnıñ qalabalıqlarnıñ teşkil etilmesine alâqası bar, dep qayd etti. İmaye tarafı ise №43 cıltta olğan mahkeme oturışuvınıñ protokolına esaslanıp, Ahtem Çiygoz böyle bir şey aytmadı, dep itiraz bildirdi. Ahtem Çiygoz ve Refat Çubarov özüni qabaatlı saymayıp, cinaiy taqip qanunsız ola, dep tüşüneler», – dep bildirdi Polozov.
Qadı Yelena Kaporina reisliginde mahkeme prokurornıñ muracaatı qanaatlendirilmeli, dep qarar çıqardı. Mahkeme, oturışuvnı 2021 senesi sentâbrniñ 9-na qaldırmağa qarar aldı. Oturışuv açıq oldı, mahkemede Ukrainanıñ Rusiye Baş konsulı Taras Malışevskiy bar edi.
Bundan evel Nikolay Polozov iyünniñ 1-nde Qırımdaki Rusiye mahkemesi tarafından 6 yılğa, 200 biñ ruble para cezasına ve tüzetici işlerge ğıyabiy şekilde üküm etilgen Qırımtatar Milliy Meclisiniñ reisi Refat Çubarovnıñ cinaiy davasınen tanıştı, dep bildirdi. Meclis reisi 2014 senesi fevralniñ 26-nda Qırım parlamenti ögünde «qalabalıqlarnı» teşkil etkeninde qabaatlandı.
Çubarov Qırım.Aqiqatqa tefsir berip, oña çıqarılğan ükümni «uquq ceetinden boş» dep adlandırdı.
Ukraina Tış işler naziriniñ birinci muavini Emine Ceppar Qırımda Çubarovğa qarşı keçirilgen mahkemeni ve çıqarılğan ükümni «utandırğan sahte mahkeme» dep adlandırdı.
Qırım Muhtar Cumhuriyetiniñ prokuraturası, Rusiye tahqiqatçılarınıñ Çubarovğa qarşı açılğan davanen bağlı tahqiqat başlattı.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
