Sentâbrniñ 22-nde Qırımtatar Milliy Meclisiniñ reisi, III-V ve VIII çağırılış Ukraina halq deputatı Refat Çubarov 64 yaşını toldura. Cemaat ve siyaset erbabı 2009 senesinden berli Dünya qırımtatar kongressiniñ reisi ola.
Refat Çubarov 1957 senesi sentâbrniñ 22-nde Özbek Sovet Sotsialistik Cumhuriyetiniñ Samarqand şeerinde doğdı, 1944 senesi qorantası anda Sudaqnıñ Ay-Serez köyünden sürgün etilgen edi. 1968 senesi ana-babasınen beraber Qırımğa qayttı. 2014 senesi Qırımnıñ Rusiye işğalinden soñ Meclis reisi yarımadanı terk etip, Kyivge köçmege mecbur edi.
2014 senesi mayısnıñ 4-nde o vaqıt Qırımnıñ Rusiye prokurorı olğan Natalya Poklonskaya Refat Çubarovnı «ekstremist faaliyeti qabul etilmeycek», dep tenbiledi. 2014 senesi iyülniñ 5-nde Çubarovnıñ Rusiyege ve işğali altındaki Qırımğa kirişi beş yılğa yasaqlandı.
2019 senesi iyülniñ 5-nde beş yıllıq kiriş yasağı bitti. Amma, Çubarovnıñ aytqanına köre, Qırımğa kene de barmağa imkânı yoq, çünki anda «Rusiyeniñ anayasa qurumı ve telükesizliginiñ esaslarına qarşı cinayetler» içün ğıyabiy apis qararı çıqarıldı.
2021 senesi iyünniñ 1-nde Kreml kontrolindeki Qırım mahkemesi 2014 senesi fevralniñ 26-nda Qırım parlamenti ögünde «qalabalıqlarnı teşkil etüv» qabaatlavı boyunca 6 yıl apis cezası, 200 biñ ruble para cezası ve tüzetüv işleri ğıyabiy qararını çıqardı. Daa soñra Soçideki Üçünci istinaf mahkemesi bu qararnı deñiştirmedi.
Çubarov Qırım.Aqiqatqa bergen tefsirinde çıqarılğan ükümni «uquq ceetinden boş» dep adlandırdı.
Qırımtatar Milliy Meclisiniñ reisi Refat Çubarovnıñ doğğan künü munasebetinen Qırım.Aqiqat ayatınıñ müim fotoresimlerini topladı.
Facebook Forum