Qırımtatar Milliy Meclisiniñ reisi Refat Çubarov, 2014 senesi Rusiyeniñ Qırımğa arbiy istilâ yapacağını tüşünmegen edi, dep qayd etti.
Rusiyeniñ Qırımğa arbiy yolnen kirecegi «aqlıma bile kelmegen edi». Bu aqta o, fevralniñ 26-nda Qırım.Aqiqat Radiosında «Rusiye Qırımda. Tirenüvniñ 6 yılı» marafonında ayttı.
«Doğrusını aytqanda, Rusiyeniñ Qırımğa ordusınen kirecegi aqlımnıñ ucuna bile kelmedi. Kirişip, faal sürette belli şartlar qoyacağından şübhem bile yoq edi. Buña yol bermeycek edik», – dedi Çubarov.
Rusiye kontrolindeki Qırım yolbaşçısı Sergey Aksenovnıñ içtimaiy ağlarda yazğanına köre, o zamannıñ adise-vaqiaları «yarımadanıñ taqdirini belgilegen külminatsion kün» oldı.
Qırım.Aqiqat Radiosında «Rusiye Qırımda. Tirenüvniñ 6 yılı» marafonı başlandı. O, 14:00-ğa qadar (Qırım diñleyicileri içün 15:00-ğa qadar) devam etecek. Marafon Ukrainada fevralniñ 26-nda qayd etilgen Qırımnıñ Rusiye işğaline qarşı tirenüv kününe bağışlana.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
