Link açıqlığı

Saatnıñ esas haberi

Refat Çubarov: Ne o, ne de biz Qırım qurtarılğanını daa körmedik


Reşat Abibullayev (sağdan) ve Abduraman Çubarov
Reşat Abibullayev (sağdan) ve Abduraman Çubarov

Reşat Abibullayev maña ayttı: «Qırımnı qaytarmağance bir yerge ketmeycem»

Fotoresimde – 2008 senesi, Qırım, Yañı Qapu rayonı, Berdi Bolat köyü, oña 1944 senesi mayıs 18 qırımtatar sürgünliginden soñ Privolnoye adı berildi.

Ev damına sarılıp ketken yüzüm bağı altında sıcaq bir yaz künü eki sadık dost otura: babam Abduraman (soldan) ve Reşat ağa Abibullayev.

Babam 2014 senesi martnıñ 30-nda, Qırım Rusiye ordusı tarafından işğal etilgende vefat etti. Bütün Qırımdan biñden çoq insan kelgen cenazesi köyni toldurğan Rusiye mahsus hızmetleri hadimleriniñ yüzsüz közetüvi altında keçti.

Soñki yolğa ozğarıp olamağan yaqın insanlarımnıñ cedvelini endi tizmeyim...

Bir qaç aydan soñ Rusiye quvetçileri maña Qırımda yaşamağa yasaq etti ve o vaqıttan berli Reşat ağanı körmedim, amma ara-sıra ondan selâm aytıp, balqurtlığından çöl balını ketire ediler. Meni 70-lerniñ başlarında Milliy areket ikâyelerini diñlemege sevgen oğlançıq olaraq tüşünmege devam etken edi.

Bugün saba saat 4.40-ta Messengerde Reşat ağanıñ qızı Leniyardan kederli mesac keldi: «Refat ağa, babam keçindi…».

Soñki yolğa ozğarıp olamağan yaqın insanlarımnıñ cedvelini endi tizmeyim… Ebet, qabaatlılarnı bilem, amma daa qolay olmay, çünki bu normal bir şey degil.

Reşat ağa maña, amma başqaları da eşitsin dep, bir şey ayttı: «Qırımnı qaytarmağance bir yerge ketmeycem».

…2014 senesi martnıñ 31-nde, babam defin etilgen ve dua oqulğan soñ, Reşat ağa maña, amma başqaları da eşitsin dep, bir şey ayttı: «Qırımnı qaytarmağance bir yerge ketmeycem».

Reşat ağa sözüni tuttı, bir yerge ketmedi ve Qırım toprağında defin etilecek, amma ne o, ne de biz Qırımnıñ Rusiye işğalcilerinden qurtarılğanını daa körmedik.

Elvida, Reşat ağam! Elvida!

P.S. Reşat ağanıñ taqdiri aqqında bir şeyler bilmege isteseñiz, onıñ aqqında kiçik maqale oqumañız mümkün.

Refat Çubarov, Qırımtatar Milliy Meclisiniñ reisi

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

(Refat Çubarovnıñ Facebook saifesinden alındı)

XS
SM
MD
LG