Aqyarnıñ Rusiye yolbaşçısı Mihail Razvojayev Aqyarğa eki ava nişanınıñ ücüm etkenini bildirdi. Onıñ sözlerine köre, nişanlar RF Ava Mudafaası sisteması tarafından urıp tüşürilgen.
"İlk malümatqa köre, deñiz akvatoriyasında Şimaliy mol üzerinde 2 ava nişanı urıp tüşürilgen. Aqyar qurtarıcılar hızmetiniñ bildirgeni kibi, al-azırda infraterkip zarar körgeni qayd etilmegen", - dep yazdı Razvajayev.
Bu malümatnıñ mustaqil menbalardan teşkerilmesi şimdilik imkânsızdır.
Evel Razvojayev ava telükesi signalı lâğu etilgenini bildirgen edi.
Daa evel Qırım.Aqiqat mühbiri Aqyarda saat yerli vaqıtnen saat 10:40-da bir qaç patlav sesi eşitilgenini haber etken edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
