Aqyarnıñ Rusiye yolbaşçısı Mihail Razvojayev, oktâbrniñ 3-nde aqşam şeerniñ üzerinde ava mudafaası sisteması çalışqanını bildirdi.
Memurnıñ bildirgeni kibi, İnjenerna deresinde mesken evlerden biriniñ damına dron parçaları tüşken.
"Kimse zarar körmedi. Yalıñız urıp tüşürilgen dron parçalırndan sebep bazı dairelerniñ pencerelerinde caplar çatladı", - dep yazıla bildirmede.
Aynı zamanda RF Mudafaa nazirliginde Qara deñizniñ şimal-ğarp tarafında "Neptun" raketası urıp tüşürilgeni aqqında bildirdiler.
Evel Aqyarda ava telükesi ilân etilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
