Aqyarnıñ işğal yolbaşçısı Mihail Razvojayev rusiyeliler Aqyar ve Qırımda gizli seferberlik azırlağanı aqqında malümatqa yalan dedi.
"Daa bir yalan malümat. Dersiñ yarımadada gizli seferberlik azırlana ve ordu hızmetinden serbest olğanlarğa da celnameler kelip başlağan. Elbette bu yalan!", - dep yazdı o.
Amma, "yanvarniñ 23-nden baarki askerlikke celp etüv çerçivesinde IT mütehassısları içün arbiy hızmetten müddetni uzatuv ile bağlı arizalarnıñ qabulı başlancaq" dep bildirdi.
Cenk vaziyetinde bu malümatnıñ kerçekligini teşkermek imkânsızdır.
Rusiye işğal etilgen Qırımda gizli seferberlikke azırlana. Bunıñ aqqında yanvarniñ 20-nde Ukrayina SQ Baş ştabı haber etti.
"Hususan, Aqyarda IT mütehassıslarını, maliye hadimlerini ve ordu hızmetinden serbest olğan diger mütehassıslarnı şeerniñ arbiy komissarlıqlarına çağırıp başladılar'', - dep yazıla bildirmede.
Evel Amerika Cenk araştırma institutı (ISW), yaqın kelecekte Rusiyede Ukrayinağa qarşı cenk içün yañı bir seferberlik dalğasınıñ ilân etile bilecegini bildirdi.
Sentâbrniñ 21-nde Rusiye prezidenti Vladimir Putin Ukrayınadaki cenkke «qısmiy» seferberlik ilân etti, biñlernen er adamı memleketten qaçtı. Rusiyeliler ketken memleketlerden biri Qazahistan oldı. Eñ çoq Ruste ile sıñırdaki regionlarğa barğanlar oldı: Ğarbiy-Qazahistan, Aktobe, Kostanay, Pavlodar, Şimaliy-Qazahistan, Şarqiy-Qazahistan, Atırau vilâyetleri, Astana ve Almatığa.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
