Aqyarnıñ Rusiye yolbaşçısı Mihail Razvojayev Aqyar deñiz mıntaqasında suv üstü dronnıñ yoq etilgenini bildirdi.
"Suv üstü pilotsız uçaq Aqyar deñiz mıntaqasında yalıdan pek uzaqta flot tarafından yoq etildi. Suv naqliyatınıñ arketine qoyulğan yasaq lâğu etilgen", - dep yazdı Razvojayev.
Malümatnı mustaqil menbalardan teşkermek imkânsızdır.
Avgustnıñ 5-nde kündüz Razvojayev suv üstü dron aqqında haber etken edi, bundan soñ suv naqliyatınıñ arketine yasaq qoyulğan edi.
Ukrayina quvet hızmetleri Rusiyege qarşı ve işğal altındaki Qırımda ücümlerni çoq izaatlamay. 2023 senesi mayıs ayında Ukrayina telükesizlik hızmetiniñ yolbaşçısı Vasıl Malük Ukrayina telükesizlik hızmeti işğal etilgen Qırımda Rusiye flotunıñ gemilerine deñiz dronlarınen ücüm etkenini aydınlattı.
Ukrayina Cenübi mudafaa quvetleriniñ birleşken koordinatsion matbuat merkeziniñ matbuat kâtibi Natalâ Ğumenük Azatlıq Radiosınıñ yayınında Novorossiysk yanında patlavlar Rusiyeniñ provokatsiyaları ola bile, dep tahmin etti.
Rusiye kütleviy haber vastaları Rusiye Mudafaa nazirliginiñ malümatına esaslanıp, avgustnıñ 4-nde saba Krasnodar ülkesinde, Novorossiysk rayonında, «Rusiye gemileri eki ukrayin ekipajsız katerniñ arbiy-deñiz bazasına qarşı yapqan ücümini keri qaytardı», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
