İyünniñ 13-nde Brükselde keçirilecek "Ramştayn" formatında Ukrayina mudafaası boyunca Kontakt gruppasınıñ körüşüvi vaqtında Ukrayinanıñ ava mudafaasınıñ quvetleştirüvi muzakere etilecek. Bu aqta iyün 12-de matbuat konferentsiyasında ABD Mudafaa nazirliginiñ matbuat kâtibi Sabrina Singh bildirdi.
"Men sizge ne ayta bilem — nazirden evel aytmayım, amma o Ukrayina mudafaa kontakt gruppası ile körüşüvde qayd etecek — biz bilemiz ki, ava mudafaası Ukrayina içün prioritettir, bu olarğa kerek, Patriot ya da diger silâlar şeklinde olsun", — dep bildirdi Singh.
Aynı zamanda o, Ukrayinağa Patriot sistemasınıñ berilmesi aqqında iç bir malümat berip olamağanını qayd etti.
Bundan evel The New York Times neşiri, memuriyet ve arbiy memurlarğa esaslanıp, ABD prezidenti Joe Biden Ukrayinada Patriot raketa sistemasınıñ yerleştirilmesini tasdıqlağanını haber etti. ABD memurlarınıñ aytqanına köre, sistema Ukrayinağa yaqın bir qaç kün içinde ketirile bile.
ABD memuriyeti resmiy şekilde böyle bir qarar aqqında haber etmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
