İran akimiyeti cami ve diger diniy müessiselerniñ iş yasağını daa eki aftağa uzata, dep bildirdi memleket prezidenti Hassan Rohani aprelniñ 19-nda. Bu aqta Azatlıq Radiosı haber ete.
Rougani aytqanına köre, aprelniñ 23-nde başlaycaq musulmanlar içün mübarek Ramazan ayı devamında kütleviy toplaşuv izni qararı daa soñra qabul etilecek.
Bundan ğayrı, Tehran rıqma-rıq tolu apishanelerde koronavirus tarqaluvını yavaşlatmaq içün on biñlernen mabüsniñ vaqtınca azat etilüvi aqqında ilân etti.
Musulmanlar içün mübarek olğan Mekke ve Medine şeerleri yerleşken Saudiy Arabistan akimiyeti ise dünyadaki müminlerni Ramazan devamında evde ibadet etmesine ve koronavirus yuqunçına oğramamaq içün qaidelerni riayet etmesine çağırdı.
Johns Hopkins Universitetiniñ malümatına köre, al-azırda İranda 82211 COVID-19 hastası qayd etildi, 5118-i vefat etti, 57 biñden çoq kişi tüzelip yahşı oldı.
Dünyada 2,3 milliondan çoq COVID-19 hastası bar. 161 biñden çoq kişi vefat etti, 604 biñ insan tüzeldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
