Qırımda S-300/400 zenit-raketa kompleksleri içün konteynerde raketa taşığanı tahmin etilgen arbiy çekiciler kolonnası köründi. Şaatlarnıñ Qırım.Aqiqatqa bildirgenine köre, arbiy kolonna Keriç köprüden esas Ukraina tarafına ketti.
Rusiye ordusı işğal altındaki Qırımnı «mahsus operatsiyanı» – Rusiye arbiy istilânı ve Ukrainadaki cenk areketlerini böyle adlandıra – keçirmek içün esas Ukrainağa askerlerni ve ağır silânı taşımaq içün qullana .
Şaatlar Qırım.Aqiqatqa arbiy tehnikanı Rusiyeden Ukrainağa «Tavrida» yolundan taşığanını da bildirdi. Rusiye ordusı Ukrainadaki cenk areketlerinde zarar körgen arbiy tehnikanı Qırımdan Rusiyege taşıdı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
