Ukrayinanıñ BMT daimiy temsilcisi Serğiy Kıslıtsa, "Ukrayinanıñ barışıq ve telükesizliginiñ saqlanuvı" mevzusında BMT Telükesizlik Şurasınıñ toplaşuvında çıqışta bulunıp, Rusiyeniñ Kıyivdeki tibbiy müessiselerge ücümleri aqqında ayttı.
Diplomat qayd etti ki, "Ohmatdıt"tan ğayrı, Rusiye darbeleri Ukrayina paytahtındaki bala doğuruv evine ve mesken evine endirildi.
"Unutmañız ki, Rusiyeniñ ukrayin balalarına zarar ketirmek içün yapqan ğayretleri başından berli onıñ tecavuzınıñ esas qısmı edi. Rusiye tutıp olamaycaq ve aqıllarını yuvıp olamaycaq balalarnı Rusiye öldüre", — dep ayttı o.
Kıslıtsa Rusiyeniñ BMT Havfsızlıq şurasında reisligini tenqit etip, onıñ yerine "terrorist Putin rejiminiñ vekili" keçkenini bildirdi:
"Bugün Telükesizlik Şurasında reislik yapqan adam, Halqara cinaiy mahkemesiniñ emri ile apiske alınmaq kerek olğan ve balalarğa qarşı cinayetlerde şübeli sayılğan cinayetçiniñ vekilidir".
Diplomat qayd etti ki, resmiy Moskva vatandaş obyektlerine ücüm etkeninde "ukrayin ava mudafaasını" qabaatlasa da, rusiyeli propagandistler "daha açıq olalar" ve bazıları "Ohmadıtnı" qorquzmaq içün ücüm etkenini açıqtan-açıq tasdıqlaylar.
"Rusiyeniñ 2020 senesi Suriyede hastahanelerni ve gumanitar yardımnı qorçalamaq maqsadınen Birleşken Milletler Teşkilâtınıñ göñülli añlaşmasından çıqqanı da müimdir", — dep qoştı o.
Ukrayina vekiliniñ fikrine köre, bala hastahanesine ücüm Kremlniñ barışıq esnasında iştirak etmege istemegeni, em de "Rusiyeniñ er angi barışıq teşebbüsine, onıñ peyda oluvına baqmadan, emiyet bermegeni"ni köstere.
"Rusiye bu, rak hastalığı kibi, amma daa beter. O, öldürüv ve zorbalıqnı tarqatmağa küçü yetmegende toqtatacaq. Rusiye raketalarını urıp tüşürmek kerek. Rusiyeniñ arbiy aviatsiyasını onıñ yerleşken yerlerinde yoq etmek kerek. Telükesizlik meselelerini çezmek içün ciddiy adımlar atılmalı", — dep bildirdi Kıslıtsa.
O, 2024 senesiniñ sentâbrinde keçirilecek BMT sammitine azırlanuv aqqında da ayttı: "Bir cinayetçi tünevin bala qanına batıp, Telükesizlik Şurasınıñ reisi sandalyesinde oturıp rahat olsa, nasıl bir kelecek aqqında aytamız?"
İyülniñ 8-nde saba Rusiye ordusı Ukrayinağa kütleviy darbeler endirdi. Rusiye raketalarınıñ ücümine oğrağan obyektler arasında Kıyivdeki "Ohmatdıt" bala hastahanesiniñ odalarından biri de bar edi. Ukrayina sağlıq saqlav naziri Viktor Lâşkonıñ bildirgenine köre, dialisi yapılğan balalar bulunğan bina zarar kördi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
