17 yılğa mahküm etilgen «Hizb ut-Tahrir davasının» «ekinci Aqmescitteki gruppasınıñ» siyasiy mabüsi, faal Raim Ayvazov Rusiyeniñ Ulyanovsk vilâyetindeki Dimitrovgradnıñ apishanesine ketirildi. Bu aqta o, apayı Mavile Ayvazovağa haber etti, dep bildire «Qırım birdemligi».
İstinaf arizası baqılğan soñ Raim Ayvazov mayısnıñ soñunda Novoçerkassktaki SİZO-1 keçirildi. Dimitrovgradnıñ apishanesine o, iyün ayında keldi. Kelgende faalni karantinge qapatqanlar. Qırımtatarı sağlığından şikâyetçi degil, bundan ğayrı, tişleri tedaviylenmeli.
«Apishane urbası ve ilâhre. Rusiye ananelerine köre er şey», – dep yaza Ayvazov mektübinde.
Apishanede siyasiy mabüsni añlaşqa advokatı Mariya Eysmont ziyaret etti. «Dört saat laf ettik, alı yahşı, ev, qorantasını soray», – dep haber etti imayeci.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. 2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
