«Qırım musulmanları» davasınıñ mabüsi Raif Fevziyevni Rostov vilâyetiniñ Novoçerkassk şeeriniñ SİZO №3-nden avuştırdılar. Lâkin onı qaysı apishanege alıp keteceklerini qorantası bilmey. Bu aqta «Qırım birdemligi» ömür arqadaşı Liana Fevziyevanıñ malümatına esaslanıp bildirdi.
O, yolda qırımlı Voronejden, soñra Samaradan mektüp yazdı, dep ayttı.
«Bizim cevap mektüplerimizni endi almay. Onı endi uzaqqa alıp ketkendirler», – dedi Fevziyeva.
2021 senesi avgustnıñ 7-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp, tutulğan qırımtatarlar «terror teşkilâtını quruv ve iştirak etüvden» şübheli sayıla, dep bildirdi.
Tutulğanlar siyasiy sebeplernen bağlı davalarnıñ mahkeme oturışuvlarına muntazam sürette iştirak ete, siyasiy mabüslerniñ qorantalarına yardım ete, öz köylerinde iftarlar ve kütleviy tedbirler teşkil ete ediler.
2023 senesi mayısnıñ 31-nde Rostov-na-Donu şeeriniñ Cenübiy okrugınıñ arbiy mahkemesi Fevziyevni 12 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
