Advokat Lilâ Gemeci, FSB terrorizmde qabaatlap, mahkeme-psihiatrik ekspertizası içün hastahanege yerleştirgen imam Raif Fevziyevnen körüşti. Bu aqta Fevziyevniñ ömür arqadaşı Liana «Qırım birdemligine» bildirdi.
«Liana, Raif parmaqlıqlı penceresi olğan yarıq bir hastahane odasında tutula. Onen beraber öldürüv sebebinden mahküm etilgen daa 4 insan bar. Hastahane içinde areket etse, ayaqyolğa bile barsa, konvoy yanından ayırılmay. Ömür arqadaşınıñ aytqanına köre, aş az olsa da, tahqiqat izolâtorından daa yahşıdır. Müessisede az aşatalar, anda bir şey bermege de zor», – dep aytıla haberde.
Ömür arqadaşınıñ aytqanına köre, SİZOda Fevziyevniñ sağlığı fenalaştı – artqan qan basımınen hastahanege oğradı, bundan evel böyle problemi yoq edi.
«Bundan ğayrı, aşqazan ve içeklerde ağrıları bar. Soy-sopları yollağan ilâclarnen tedaviylenmekten başqa çaresi yoq», – dep ayta Fevziyeva aqayınıñ alı aqqında.
Avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesiniñ advokat Aleksey Ladinge esaslanıp bildirgenine köre, tutulğan qırımtatarlar «terror teşkilâtını qurğanında ve iştirak etkeninde» şübheli ola.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
