Rusiye tarafından 17 yılğa üküm etilgen «qırımlı musulmanlar» davasınıñ mabüsi Raif Fevziyev Yeniseysk apishanesinde dört yıldan soñ balalarınen körüşti. Bu aqta ömür arqadaşı Liana Fevziyeva bildirdi.
Qırımtatarınıñ apayı, 17 yaşında Abdulla, 14 yaşında İsmail ve 10 yaşında Derya ile körüşüvi iyünniñ 16-nda, onıñ doğğan kününde, oldı.
«Bu kün boranlı yağmur oldı, küçlü yağmur yağdı. <…> Niayet, odağa kirdi. Bizim, onıñ duyğularını tarif etmek zor. Amma quvanç közyaşları çoq edi», – dep tarif etti duyğularını Liana Fevziyeva.
Qadın uzun körüşüv izni fevral ayında berildi, dep ayttı. Lâkin mesafe (Qırımdan Yeniseyskke qadar 5,5 biñ kilometr bar) ve suvuqlar sebebinden körüşüv üç kere başqa vaqıtqa qaldırığan edi.
«Bir sıra masraf, küçlü Sibir suvuqlarından olğan qorqu, uzun yol ve yol zorluqları bu yolğa dayanacaqmızmı sual bere edi», – dep yazdı qırımlınıñ ömür arqadaşı.
2021 senesi avgustnıñ 7-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
«Qırım birdemligi» cemaat birleşmesi advokat Aleksey Ladinniñ malümatına esaslanıp, tutulğan qırımtatarlar «terror teşkilâtını quruv ve iştirak etüvden» şübheli sayıla, dep bildirdi.
Tutulğanlar siyasiy sebeplernen bağlı davalarnıñ mahkeme oturışuvlarına muntazam sürette iştirak ete, siyasiy mabüslerniñ qorantalarına yardım ete, öz köylerinde iftarlar ve kütleviy tedbirler teşkil ete ediler.
2023 senesi mayısnıñ 31-nde Rostov-na-Donu şeeriniñ Cenübiy okrugınıñ arbiy mahkemesi Fevziyevni 12 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
